மோகன்லாலின் ‘மலைக்கோட்டை வாலிபன்’ சரித்திர படம் : முதல்பார்வை வெளியானது
15 ஏப், 2023 – 14:12 IST
முன்னணி மலையாள இயக்குனர் லிஜோ ஜோஸ் பெல்லிசேரி இயக்கத்தில் மோகன்லால் நடித்து வரும் படம் ‘மலைக்கோட்டை வாலிபன்’. ஜான் மேரி கிரியேட்டிவ், செஞ்சுரி பிலிம்ஸ் மற்றும் மேக்ஸ் லேப் ஆகிய பட நிறுவனங்கள் சார்பில் தயாரிப்பாளர்கள் ஷிபு பேபி ஜான், கொசுமோன் மற்றும் அனுப் ஆகியோர் இணைந்து தயாரிக்கின்றனர். இப்படத்தின் படப்பிடிப்பு கடந்த ஜனவரி மாதம் 18ஆம் தேதி ராஜஸ்தான் மாநிலத்தில் உள்ள ஜெய்சல்மாரில் தொடங்கியது. படப்பிடிப்பு தொடர்ந்து நடைபெற்று வருகிறது.
ரசிகர்களால் பெரிதும் எதிர்பார்க்கப்பட்டு வரும் இப்படத்தின் கதை மற்றும் பின்னணி குறித்து எதுவும் வெளியாகவில்லை. என்றாலும் படத்தின் தலைப்பை வைத்து இது ஒரு சரித்திர படமாக இருக்கலாம் என்பதை கணிக்க முடிந்தது. தற்போது வெளியிடப்பட்டிருக்கும் படத்தின் முதல் பார்வை அதை உறுதிப்படுத்தியுள்ளது.
டைட்டிலில் இடம்பெற்றுள்ள அரச முத்திரை டிசைன், மோகன்லால் அணிந்துள்ள உடை சரித்திர படத்திற்கான அடையாளமாக உள்ளது. மன்னர்கள் கால கதையாக இருக்கலாம். அல்லது பல ஆண்டுகளுக்கு முன்பு வாழ்ந்த ஒரு வீரனின் கதையாக இருக்கலாம் என்று தெரிகிறது.
மோகன்லாலுடன் நடிக்கும் நடிகர்கள் பற்றிய விவரங்கள் படக்குழு அதிகாரப்பூர்வமாக அறிவிக்கப்படவில்லை. இருப்பினும் பல்வேறு மொழிகளில் பணியாற்றி வரும் முன்னணி நட்சத்திரக் கலைஞர்கள் படத்தில் நடித்து வருகின்றனர். பிரம்மாண்டமான பட்ஜெட்டில் தயாராகி வரும் இந்த படம் மலையாள மொழியில் மட்டுமல்ல இந்தியாவின் பிற முக்கிய மொழிகளிலும் வெளியாகிறது. பி. எஸ்.ரபீக் திரைக்கதை எழுத, மது நீலகண்டன் ஒளிப்பதிவு செய்கிறார். பிரசாந்த் பிள்ளை இசையமைக்கிறார்.