மனநலம் பாதிக்கப்பட்ட மகன் தாக்கியதில் தந்தை பலி.. பெரம்பலூரில் சோகம்!

பெரம்பலூர் மாவட்டம் குன்னம் அருகேயுள்ள மங்கலம் கிராமத்தில், மனநலம் பாதிக்கப்பட்ட மகன் தாக்கியதில் தந்தை உயிரிழந்த சம்பவம் சோகத்தை ஏற்படுத்தியுள்ளது.

பெரம்பலூர் மாவட்டம் குன்னம் அருகே உள்ள கீழமாத்தூர் ஊராட்சிக்கு உட்பட்டது மங்களம் கிராமம். இந்த கிராமத்தைச் சேர்ந்த செல்வராசு(65) – மணிமொழி(60) தம்பதியினருக்கு கலையரசி(28), பாண்டியராஜன்(26), அன்பரசி(24), அசோக்ராஜ்(22) ஆகிய 4 பிள்ளைகள் உள்ளனர்.இதில், கலையரசி, அன்பரசி ஆகிய இருவருக்கும் ஏற்கனவே திருமணமாகி அவர்கள் குடும்பத்துடன் வெளியூரில் வசித்து வருகின்றனர். வருகின்றனர். மூத்த மகன் பாண்டியராஜன் கடந்த சில ஆண்டுகளுக்கு முன்பு தற்கொலை செய்து கொண்டார்.

இந்நிலையில் செல்வராசு _ மணிமொழி தம்பதியினருடன் வசித்து வந்த கடைசி மகன் அசோக்ராஜ் கடந்த 5 ஆண்டுகளாக மனநலம் பாதிக்கப்பட்டு அதற்காக சிகிச்சை அளித்துள்ளார். கடந்த 5 மாதங்களாக மனநலம் பாதிப்பிற்கு அசோக்ராஜ் மாத்திரை எடுத்துக் கொள்ளவில்லை. இதனால் வீட்டில் உள்ளவர்களிடம் தகராறு செய்து பெற்றோர்களை அடித்து துன்புறுத்தி வந்துள்ளார்.

அதேபோல நேற்று இரவு 10 மணி வரை பெற்றோரிடம் தகராறில் ஈடுபட்டதால், அச்சத்தில் மணிமொழி அடுத்த வீதியில் தனது உறவினர் வீட்டில் சென்று படுத்துறங்கி உள்ளார். மேலும் நீரிழிவு நோய் உள்ளிட்ட பல்வேறு உடல் உபாதைகளால் பாதிக்கப்பட்ட செல்வராசு கட்டிலில் படுத்திருந்தபோது, ​​அவரை அசோக்ராஜ் கட்டையால் தாக்கியுள்ளார்.

தொடர்ந்து தாக்கியதில் செல்வராசு சம்பவ இடத்திலேயே உயிரிழந்தார். இதையடுத்து தந்தையின் சடலம் அருகே அசோக்ராஜ், இரவு முழுவதும் அமர்ந்துள்ளார். காலையில் மணிமொழி வீட்டிற்கு வந்து பார்த்த பிறகு செல்வராசு கொலை செய்யப்பட்டது தெரியவந்தது.

இது குறித்து மணிமொழி அளித்த புகாரின் பேரில் குன்னம் போலீசார் விரைந்து சென்று சடலத்தை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். மேலும் இந்த கொலை சம்பவத்தில் ஈடுபட்ட அசோக்ராஜை கைது செய்து விசாரணை மேற்கொண்டு வருகின்றனர். இந்த சம்பவம் அந்த கிராமத்தில் சோகத்தை ஏற்படுத்தியது.

செய்தியாளர்: ஆர்.ராஜவேல், பெரம்பலூர்.