தென்காசியில் சிறு, குறு மற்றும் நடுத்தர தொழில் நிறுவனங்களுக்கான சிறப்பு முகாம்!

தென்காசி மாவட்டத்தில் சிறு, குறு மற்றும் நடுத்தர தொழில் நிறுவனங்களுக்கான சிறப்பு முகாம் அறிவிக்கப்பட்டுள்ளது.

இதுகுறித்து மாவட்ட ஆட்சித்தலைவர் ரவிச்சந்திரன் வெளியிட்டுள்ள அறிக்கையில், “தமிழ்நாடு தொழில் முதலீட்டுக் கழகம் மாநில அளவில் செயல்பட்டு வரும் ஒரு தமிழ்நாடு அரசு நிதி நிறுவனம் ஆகும். 1949ம் ஆண்டு துவங்கப் பெற்ற இக்கழகம் மாநில அரசின் ஆதரவுடன் இதுவரை எண்ணற்ற தொழிற்சாலைகளுக்கு கடனுதவி வழங்கி தொழில் வளர்ச்சிக்கு முன்னோடியாக திகழ்கிறது.

இக்கழகம் குறு சிறு மற்றும் நடுத்தர தொழில் பிரிவுகளுக்கு புதிய தொழிற்சாலைகளை நிறுவுவதற்கும் தற்போது இயங்கி கொண்டிருக்கும் தொழிற்சாலைகளை விரிவுபடுத்துவதற்கும், உற்பத்தியை பன்முகப்படுத்துவதற்கும் பல்வேறு சிறப்புத் திட்டத்தின் கீழ் கடனுதவி வழங்கி வருகிறது.

திருநெல்வேலி கிளை அலுவலகத்தில் (முகவரி: 5சி/5பி, சகுந்தலா சாப்பிங் காம்ப்ளெக்ஸ் 2வது மாடி திருவனந்தபுரம் ரோடு, வண்ணார்பேட்டை, திருநெல்வேலி-627003) குறு சிறு மற்றும் நடுத்தர (MSME) தொழில்களுக்கான சிறப்பு தொழில் கடன் முகாம் இன்று (ஆகஸ்ட் 21) முதல் செப்டம்பர் 1ம் தேதி வரை நடைபெற உள்ளது.

இச்சிறப்பு தொழில் கடன் முகாம் டி.ஐ.ஐ.சி.யின் பல்வேறு திட்டங்களின் சிறப்பு அம்சங்கள், மத்திய மாநில அரசுகளின் மானியங்கள் (மூலதன மானியம் 1.50 கோடி மற்றும் இதர மானியங்கள்) மற்றும் புதிய தொழில் முனைவோர் மற்றும் தொழில் நிறுவன மேம்பாட்டுத் திட்டம் (NEEDS) போன்றவை குறித்த விரிவான விளக்கங்கள் தரப்படுகிறது தகுதி பெறும் தொழில்களுக்கு தமிழக அரசின் 25% முதலீட்டு மானியம் ரூ.150 லட்சம் வரை வழங்கப்படும்.

இதையும் படிங்க : சாதனை சிறுமிகளுக்கு மத்திய அரசு விருது: யாரெல்லாம் விண்ணப்பிக்கலாம் தெரியுமா?

மேலும் 3% வட்டி மானியம் பெற்றுத்தரப்படும். நவீன அரிசி ஆலை விரிவாக்கத்திற்கு 5% வட்டி மானியம் பெற்று தரப்படும். அண்ணல் அம்பேத்கர் தொழில் முன்னோடிகள் திட்டத்தின் (AABCS) மூலம் தகுதி பெறும் தொழில்களுக்கு தமிழக அரசின் 35% முதலீட்டு மானியம் ரூ.150 இலட்சம் வரை வழங்கப்படும். மேலும் 6% வட்டி மானியம் பெற்றுத்தரப்படும்.

தென்காசி மாவட்ட தொழில் அதிபர்கள் மற்றும் புதிய தொழில் முனைவோர்கள் விவரங்கள் அறிய வரும் ஆகஸ்ட் 25 அன்று காலை 11.00 மணியவில் தென்காசி மாவட்ட சிறு, குறு மற்றும் நடுத்தர தொழில் தொழில் நிறுவனங்கள் சங்கத்தில் வைத்து நடைபெறும் நிகழ்ச்சியில் கலந்து கொண்டு தொழில் தொடங்கலாம்.

இந்த முகாம் காலத்தில் சமர்பிக்கப்படும் கடன் விண்ணப்பங்களுக்கு ஆய்வு கட்டணத்தில் 50% சலுகை அளிக்கப்படும். இந்த அரிய வாய்ப்பினை புதிய தொழில் முனைவோர் / தொழிலதிபர்கள் பயன்படுத்தி தொழில் திட்டங்களுடன் வருகை தந்து தொழில் கடன் மற்றும் மத்திய, மாநில அரசுகளின் மானிய கொள்ளுமாறு மாவட்ட சேவைகளை பயன்படுத்திக்கொள்ளலாம்” என தெரிவித்துள்ளார்.

உங்கள் ஊர் செய்திகளை வீடியோவாக பெற கிளிக் செய்க