கரூரில் 25 வருடங்களாக கோரிக்கை வைத்தும் தார் சாலை அமைத்து தராததால் மழை காலங்களில் தேங்கிய மழைநீரில் நடந்து செல்வதாக பொதுமக்கள் வேதனை தெரிவித்துள்ளனர்.
கரூர் மாவட்டம் கிருஷ்ணராயபுரம் சட்டமன்ற தொகுதிக்குட்ப்பட்ட பழைய ஜெயங்கொண்டம் பேரூராட்சி, உடைய குளத்துப்பட்டியில் இருந்து மலப்பட்டி வரை சுமார் 600 மீட்டர் மண் சாலை அமைந்துள்ளது. இந்த பகுதியில் சுமார் 30க்கும் மேற்பட்ட குடும்பங்கள் வசித்து வருகின்றனர்.
இப்பகுதி மக்கள் கடந்த 25 ஆண்டுகளாக தார் சாலை அமைத்து தர தொடர்ந்து கோரிக்கை வைத்துவரும் நிலையில் தற்போதுவரை சாலை அமைக்கப்படவில்லை. இதனால் மழை காலங்களில் அத்தியாவசிய தேவைகளுக்கு கூட வெளியே செல்ல முடியாத நிலை ஏற்படுவதாகவும் சாலையில் ஆங்காங்கே மழை நீர் தேங்கி நிர்ப்பதால் பள்ளிக்கு செல்லும் சிறுவர்கள் சாலையில் விழுந்து காயம் ஏற்படுவதாகவும் பொதுமக்கள் தெரிவித்துள்ளனர்.
மேலும் மழை காலங்களில் சாலையில் மழை நீர் தேங்கி நிற்பதால் 10 கிலோமீட்டர் தூரம் வரை கிராமத்தை சுற்றிச் செல்ல வேண்டிய நிலை ஏற்படுவதாகவும் தெரிவித்துள்ளனர். எனவே மண் சாலையை சீரமைத்து தார் சாலை அமைத்தால் மலப்பட்டி மற்றும் மாயனூர், கரூர் ஆகிய பகுதிகளுக்கு செல்லும் பொதுமக்கள் இந்த வழியாக சீக்கிரம் செல்ல முடியும் எனவும், இதனால் பள்ளி மாணவர்கள் பள்ளிகளுக்கு சென்று வர ஏதுவாக இருக்கும் எனவும் பொதுமக்கள் தெரிவிக்கின்றனர்.
இதையும் படிங்க : சாலை இல்லை.. ஒரே ஒரு குடும்பம் மட்டுமே வசிக்கும் இந்திய கிராமம் பற்றி தெரியுமா?
மேலும் இது குறித்து கடந்த 25 ஆண்டுகளாக பேரூராட்சி நிர்வாகம், மாவட்ட நிர்வாகம் என மாறி மாறி கோரிக்கை மனு அளித்தும் எந்தவித நடவடிக்கையும் மேற்கொள்ளவில்லை எனவும், வரும் மழை காலத்திற்குள் சாலை அமைக்க நடவடிக்கை எடுக்கப்படவில்லை எனில் தங்களது குடும்ப அட்டை, வாக்காளர் அடையாள அட்டை, ஆதார் அட்டை உள்ளிட்டவற்றை தமிழக அரசிடம் திரும்ப ஒப்படைக்க போவதாகவும் தெரிவித்துள்ளனர்.
செய்தியாளர்: கார்த்திகேயன், கரூர்
உலகம் முதல் உள்ளூர் வரை இன்றைய முக்கிய செய்திகள் (Top Tamil News, Breaking News), அண்மைச் செய்திகள் (Latest Tamil News), அனைத்தையும் நியூஸ்18 தமிழ் (News18Tamil.com) இணையதளத்தில் உடனுக்குடன் அறியலாம்.
நியூஸ்18 தமிழ்நாடு தொலைக்காட்சியை, ARASU CABLE – 46, TCCL – 57, SCV – 28, VK Digital – 30, SUN DIRECT DTH: 71, TATA PLAY: 1562, D2H: 2977, AIRTEL: 782, DISH TV:2977 ஆகிய அலைவரிசைகளில் காணலாம்.