காதல் விவகாரம்.. பாஜக பெண் நிர்வாகி படுகொலை

சேலத்தில் பாஜக மகளிர் அணி மாவட்ட செயற்குழு உறுப்பினர் கழுத்து அறுத்து கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.

சேலம் மாவட்டம் அன்னதானப்பட்டி பகுதியை சேர்ந்தவர்கள் கண்ணன், சாந்தி தம்பதியினர். கண்ணன் சலூன் கடை வைத்துள்ளார், சாந்தி சேலம் மாவட்ட மகளிர் அணி செயற்குழு உறுப்பினராக உள்ளார். கண்ணனின் தம்பி கருணாநிதி என்பவரும் சலூன் கடையில் வேலை செய்து வந்துள்ளார். இந்நிலையில் கருணாநிதியின் மகள் ராஜேஸ்வரியும் அதே பகுதியை சேர்ந்த மோகன்லால் என்பவரும் காதலித்து வந்துள்ளனர்.

இவர்களது காதலுக்கு பெற்றோர் தரப்பில் இருந்து எதிர்ப்பு தெரிவித்து வந்தனர். இந்த நிலையில் கடந்த 13ம் தேதி ராஜேஸ்வரியும், மோகன்லாலும் வீட்டிற்கு தெரியாமல் திருமணம் செய்து கொண்டுள்ளனர். இதை ராஜேஸ்வரியின் பெற்றோர் கடுமையாக கண்டித்துள்ளனர். இதனால் காதலர்கள் இருவரும் சேலம் அஸ்தம்பட்டி காவல் நிலையத்தில் கடந்த வாரம் தஞ்சமடைந்தனர். அப்போது இருதரப்பினரையும் போலீசார் சமாதானம் செய்து வைத்த நிலையில், ராஜேஸ்வரி தனது கணவனுடன்  செல்வதாக கூறி மோகன்லாலுடன் சென்று விட்டார்.

இந்த நிலையில் ராஜேஸ்வரி மற்றும் அவரது கணவன் மோகன்லால் இருவரும் நேற்று இரவு கண்ணனின் வீட்டிற்கு சென்றுள்ளனர். இதை அறிந்த கருணாநிதி தனது மகள் காதல் திருமணம் செய்துக்கொண்டதற்கு, அண்ணி சாந்திதான் காரணம் என்று ஆத்திரமடைந்த அவர் கண்ணனின் வீட்டிற்கு சென்று வாய் தகராறில் ஈடுபட்டுள்ளார். தகராறு முற்றிய நிலையில் வீட்டில் இருந்த கத்தியை எடுத்து சாந்தியின் கழுத்தை அறுத்துள்ளார்.

இதையும் படிங்க : நடிகர் விஜய் ஆண்டனி மகள் மரணம்.. வெளியான அதிர்ச்சி தகவல்

இந்த சம்பவத்தில் படுகாயமடைந்து ரத்த வெள்ளத்தில் சரிந்த சாந்தியை உறவினர்கள் மீட்டு மருத்துவமனைக்கு கொண்டு சென்றனர். ஆனால் மருத்துவமனைக்கு கொண்டு செல்லும் வழியிலே சாந்தி உயிரிழந்தார். பின்னர் சாந்தியின் உடல், உடற்கூறாய்விற்காக சேலம் அரசு மருத்துவமனைக்கு அனுப்பிவைக்கப்பட்டது. இந்த தகவல் அறிந்து சம்பவ இடத்திற்கு சென்ற போலீசார் கொலை சம்பவம் குறித்து வழக்குப்பதிவு செய்து தலைமறைவாக உள்ள கருணாநிதியை கைது செய்ய தனிப்படை அமைத்து தேடிவருகின்றனர்.

செய்தியாளர் : திருமலை தமிழ்மணி, (சேலம் )