சேலம் மாவட்டம் எடப்பாடியில் செய்தியாளர்களை சந்தித்த எடப்பாடி பழனிசாமி, பாஜகவுடன் இனி கூட்டணி இல்லை என தெளிவாக கூறிவிட்டதாகவும், தொண்டர்களின் கருத்துகளின் அடிப்படையில் ஏகமனதாக தீர்மானம் நிறைவேற்றப்பட்டதாகவும் தெரிவித்தார். கூட்டணியில் இருந்து விலகிய முடிவில் எந்த மாற்றமும் இல்லை எனக் கூறிய எடப்பாடி பழனிசாமி, தேசிய ஜனநாயக கூட்டணியில் இருந்தும் அதிமுக விலகிவிட்டது என்றார். அதிமுக உடன் பேச்சுவார்த்தை நடப்பதாக பாஜக துணைத் தலைவர் வி.பி.துரைசாமி தெரிவித்தது அவரது சொந்த கருத்து என்றும் அதிமுக கூட்டணியில் புதிய கட்சிகள் இணையும், பொறுத்திருந்து பாருங்கள் எனவும் தெரிவித்தார்.
பாஜக மாநிலத் தலைவரை மாற்ற வலியுறுத்தவில்லை
தொகுதி பங்கீடு தொடர்பாக பிரதமர் மோடி, உள்துறை அமைச்சர் அமித் ஷா ஆகியோரிடம் எந்த அழுத்தத்தையும் தரவில்லை என்றும் மாநில பாஜக தலைவரை மாற்றவேண்டும் என்று தாங்கள் கோரிக்கை வைக்கவில்லை எனவும் கூறினார், அதிமுக தலைமையில் மிகப்பெரிய கூட்டணி அமைத்து நாடாளுமன்ற தேர்தலில் வெற்றி பெறுவோம் என்றும் எடப்பாடி பழனிசாமி நம்பிக்கை தெரிவித்தார்.
காவிரி பிரச்னையை முன்வைக்காதது ஏன்?
மாதாந்திர தவணையில் நீர் திறக்க கர்நாடக அரசை முதலமைச்சர் மு.க.ஸ்டாலின் வலியுறுத்தியிருக்க வேண்டும் எனக் கூறியுள்ள எடப்பாடி பழனிசாமி, ’இந்தியா’ கூட்டத்தில் காவிரி பிரச்னையை முன்வைத்திருந்தால் சாதகமான சூழல் ஏற்பட்டிருக்கும் எனக் கூறினார். இந்தியா கூட்டணியில் சேரும் போது காவிரி விவகாரத்திற்கு தீர்வு கேட்டு முதலமைச்சர் அந்தக் கூட்டணியில் சேர்ந்திருக்க வேண்டும் என்றார்.
டெல்டா பாசன விவசாயிகளின் கண்ணீரை அரசு கண்டுகொள்ளவில்லை என்றும் குற்றஞ்சாட்டினார். மேட்டூரில் இன்னும் 3 நாட்களுக்குதான் தண்ணீர் திறக்க முடியும் என்றும் மாதாந்திர தவணையில் நீர் திறக்க கர்நாடக அரசை தமிழக முதலமைச்சர் வலியுறுத்தியிருக்க வேண்டும் எனவும் தெரிவித்தார்.
தேர்தல் வாக்குறுதிகளில் 10% கூட திமுக அரசு நிறைவேற்றவில்லை என விமர்சித்த எடப்பாடி பழனிசாமி, நாடாளுமன்ற தேர்தல் அதிமுக கூட்டணிக்கு சாதகமாக இருக்கும் என்றும் நாடாளுமன்ற தேர்தலில் 40 தொகுதிகளிலும் அதிமுக வெற்றி பெறும் எனவும் தெரிவித்தார்.
மத்திய அமைச்சரை சந்தித்தது ஏன்?
தென்னை விவசாயிகள் பிரச்சினைகளுக்கு தீர்வு காணவே அதிமுக எம்எல்ஏக்கள் மத்திய அமைச்சர் நிர்மலா சீதாராமனை சந்தித்ததாக எடப்பாடி பழனிசாமி விளக்கமளித்தார்.
உலகம் முதல் உள்ளூர் வரை இன்றைய முக்கிய செய்திகள் (Top Tamil News, Breaking News), அண்மைச் செய்திகள் (Latest Tamil News), அனைத்தையும் நியூஸ்18 தமிழ் (News18Tamil.com) இணையதளத்தில் உடனுக்குடன் அறியலாம்.
நியூஸ்18 தமிழ்நாடு தொலைக்காட்சியை, ARASU CABLE – 46, TCCL – 57, SCV – 28, VK Digital – 30, SUN DIRECT DTH: 71, TATA PLAY: 1562, D2H: 2977, AIRTEL: 782, DISH TV:2977 ஆகிய அலைவரிசைகளில் காணலாம்.